Pangangalampag ng maralita

PANGANGALAMPAG NG MARALITA

mahigpit kaming nakikiisa sa maralita

nang dahil sa lockdown ay nangalampag silang sadya

lalo't magugutom ang maraming pamilyang dukha

walang kita, lockdown na naman, nakakatulala

dahil daw sa Delta variant kaya nag-lockdown muli

gobyerno'y walang masagawang ibang tugon kundi

lockdown, kwarantina, ECQ, GCQ, lockdown uli

tugon ba ng pamahalaan ay ganito lagi?

perwisyong lockdown, para sa maralita'y perwisyo

intensyon sana'y maganda kundi gutom ang tao

di magkakahawaan subalit walang panggasto

di makapaghanapbuhay,  walang kita't trabaho

labinglimang araw na puno ng pag-aalala

dahil di sapat ang salapi para sa pamilya

upang matugunan ang gutom, wala ring ayuda

kung mayroon man, di pa nakatitiyak ang masa

kaya ang mga maralita'y muling nangalampag

mga panawagan nila'y kanilang inihapag

inilabas ang saloobin, di sila matinag

bitbit ang plakard ay nagkakaisang nagpahayag

- gregoriovbituinjr.

08.05.2021

* Ikalima ng hapon sa bisperas ng lockdown ay nangalampag ang mga maralita sa iba't ibang lugar sa bansa sa pangunguna ng Kongreso ng Pagkakaisa ng Maralitang Lungsod (KPML)

* Kuha ang ilang litrato mula sa iba't ibang eryang kinikilusan ng KPML, pasasalamat sa mga nagbahagi

* Ayon sa ulat, magla-lockdown sa Metro Manila mula Agosto 6 hanggang 20, 2021

Maling tanong sa palaisipan

Maling tanong sa palaisipan

Tingnan sa 30 Pahalang: "Sukat na katumbas ng tatlong pulgada." Ang pulgada ay inch sa Ingles. Anong sukat ang katumbas ng 3 inches?

Ang sagot sa palaisipan ay YARDA. Kung yarda, katumbas niyan ay 3 feet, hindi 3 inches. Tatlong talampakan o tatlong piye, hindi tatlong pulgada. "Sukat na katumbas ng tatlong talampakan" ang dapat na tanong. Sana'y naging maingat naman ang gumagawa ng mga krosword na ito.

Nakalikha tuloy ako ng isang soneto o tulang may labing-apat na taludtod hinggil dito:

MALING TANONG SA KROSWORD

pamali-mali na ang tanong sa palaisipan
balak yatang ang sasagot ay bigyang-kalituhan
ngunit sa maling tanong, nakita ang kabugukan
o marahil kawalang ingat ng gumawa niyan

bakit ang tanong ay "katumbas ng tatlong pulgada"?
imbes na "tatlong talampakan" sa sagot na YARDA
lasing ba ang gumawa o nalito lang talaga?
matatalino ang gumagawa ng krosword, di ba?

ang palaisipan ay isa rin namang aralin
upang ang ating bokabularyo pa'y paghusayin
baka may salitang sa tula'y magandang gamitin
o may matagpuang salitang malalim sa atin

pagbutihin ang paggawa ng krosword, aking hirit
at ganyang pagkakamali'y di na sana maulit

- gregoriovbituinjr.
08.05.2021

Pahimakas kay Neil Doloricon

PAHIMAKAS KAY NEIL DOLORICON

taas-kamaong pagpupugay kay Neil Doloricon
sa kanyang mapagpalayang sining noon at ngayon
kapuri-puring pagguhit na kanyang dedikasyon
upang ilarawan ang sa bayan ay aping seksyon

nang mabasa sa balita ang kanyang pagkamatay
ako'y nalungkot subalit naritong nagpupugay
gayunman, marami siyang pamanang anong husay
mapagmulat, palaban, may hustisyang tinataglay

may pamanang naiwan sa tanggapan ng paggawa
na kanyang iginuhit, siya mismo ang lumikha
hinggil iyon sa aklasan ng mga manggagawa
isang alaala sa kanyang husay sa pagkatha

pinamagatan iyong "Tunggalian sa Piketlayn"
na iyong makikita sa tanggapan ng Bukluran
paglalarawan sa obrerong nakikipaglaban
upang kamtin ang asam na hustisyang panlipunan

muli, Neil Doloricon, taospusong pagpupugay
sayang at di kita nakasama sa paglalakbay
ang sining mo't ang tula ko sana'y nagkaagapay
upang itaguyod ang hustisya hanggang tagumpay

- gregoriovbituinjr.
08.04.2022

* Ang nasabing sining ni Neil Doloricon, na nasa tanggapan ng Bukluran ng Manggagawang
Pilipino (BMP), ay may petsang 1987
* Neil Doloricon (1957-Hulyo 16, 2021)
* Sanggunian ng ilang datos:
http://artasiapacific.com/News/ObituaryNeilDoloricon1957to2021
https://www.rappler.com/life-and-style/arts-culture/artist-neil-doloricon-dies

Wagi sa Math Olympiad 2021

WAGI SA MATH OLYMPIAD 2021

mula sa Olympics na mga medalya'y nakamit
Hidilyn Diaz at Nesthy Petecio ang sumungkit
sa International Math Olympiad din ay humirit
anim na medalya'y sa Pilipinas isinabit

pagpupugay sa mga nagwagi sa math olympiad
pagkat kanilang misyon ay di nabigo't natupad
anim na estudyanteng sa paligsahan umusad
apat na pilak at tatlong tansong medalya'y gawad

kinatawan ng bansa, anim na nakipagtagis
apat na medalyang pilak, nakamtang anong tamis
nina Raphael Dylan Dalida, Bryce Ainsley Sanchez,
Immanuel Josiah Balete, at Steven Reyes

habang nakapagkamit naman ng tansong medalya
sina Vincent Dela Cruz at Sarji Elijah Bona
patunay ng galing ng Pinoy sa matematika
sana sa larangang iyan ay magpatuloy sila

pagpupugay sa magagaling nating sipnayanon
sa sipnayan o matematika'y di nagkataon
sadyang magagaling ang mga estudyanteng iyon
at sana silang nanalo sa bansa'y makatulong

- gregoriovbituinjr.
08.04.2021

Sanggunian:
https://www.gmanetwork.com/news/lifestyle/hobbiesandactivities/798088/philippines-bags-6-medals-at-international-math-olympiad/story/
https://news.abs-cbn.com/news/08/02/21/filipino-students-6-medals-62nd-math-olympiad

Ayuda

AYUDA

nananawagan sila ng ayuda, ako'y hindi
pagkat pamilya'y magugutom, sitwasyong malala
ako'y aktibistang Spartan, tiyan ma'y humapdi
babangon, kikilos, gutom na'y binabalewala

kaya di ko ramdam yaong panawagang ayuda
dahil nakasanayan ko nang mabuhay ng solo
sabihin mang nagkaasawa na't nagkapamilya
ngunit asawa'y nasa probinsya, ako'y narito

ngayon, panibagong lockdown ay muling papalapit
maraming mawawalan ng trabaho't magugutom
kaya maraming babaling sa gobyerno't hihirit
na mabigyan ng ayuda habang kamao'y kuyom

ako'y di hihingi sa gobyernong walang respeto
sa karapatang pantao't pasimuno ng tokhang
hihingian pa'y walang galang sa due process of law
hihingan sila ng ayuda? silang pumapaslang?

pag nabigyan ba akong ayuda'y utang na loob?
sa gobyernong buhay ng tao'y basta kinikitil?
titigilan na ba ang panunuligsang marubdob?
pag nabusog sa ayuda'y pipikit na sa taksil?

tila ako'y dukhang humihingi ng dagdag sahod
gayong walang trabaho't pabrikang pinapasukan
tila ba humihingi sa gobyernong nakatanghod
na tingin sa masa'y piyon lang sa chess o digmaan

bagamat panawagang ayuda'y di ko man ramdam
ay tutulong sa kampanya't sigaw ng maralita
ipapakitang kahit ganito'y may pakialam
kahit ayokong humingi sa gobyernong kuhila

- gregoriovbituinjr.
08.04.2021

Di man pansinin sa pagyoyosibrik

DI MAN PANSININ SA PAGYOYOSIBRIK

pansin ko, walang pumapansin sa aking kampanya
laban sa upos ng yosi, dahil kakaiba ba?
bakit ako ang gumagawa, bakit di ang iba?
bakit ginagawa ko ito, para ba sa masa?

subalit kahit na ganoong walang pumapansin
patuloy pa rin ako sa niyakap na layunin
kaysa makitang bayan ay sa upos lulunurin
lalo na't isda sa laot, upos na'y kinakain

kailangang kumilos at magbigay halimbawa
isang pagbabakasakali tumulong din ang madla
na kalinisan din ng paligid ay maunawa
na di tapon dito, tapon doon ang ginagawa

baka sadyang mahina lang ako sa pagtaguyod
na upos sa kalikasan ay di nakalulugod
na baka isda sa laot sa upos na'y malunod
na walang kapupuntahan ay nagpapakapagod

hayaan n'yo na ako sa ginagawa kong ito
na sa bote'y magtipon ng upos ng sigarilyo
kapara ng ekobrik ay yosibrik ang gawa ko
adhikaing ito sa kapwa'y di naman perwisyo

- gregoriovbituinjr.
08.04.2021

Ang tula sa rali

ANG TULA SA RALI

minsan, may kredibilidad din ang nilikhang tula
pag kasama sa pakikibaka ng manggagawa
pag nakikipamuhay sa magsasaka't dalita
at sa Mendiola'y binibigkas ang tulang kinatha

madalas, may handa na akong tulang bibigkasin
isang araw bago ang rali, paksa'y aalamin
anong linya't tindig sa isyu, iyon ang sulatin
bagamat bawat tula ko'y may tugma't sukat pa rin

di ko pupurihin sa tula ang kapitalista
kundi ilantad ang kanilang pagsasamantala
di ko pupurihin ang tula sa kapitalista
kundi ilahad ang nasang panlipunang hustisya

iyan ang papel kong mahalagang ginagampanan
nasa rali man, nasa komunidad o saanman
ako'y makatang adhika'y makataong lipunan
at pagtula ko sa rali'y pagsisilbi sa bayan

- gregoriovbituinjr.